［香港最黑暗的一天！］大家同聲一哭！國泰已經完成收購快運
個題同上次宣佈時一樣（http://bit.ly/2M69ZUl）。上次就宣佈死刑，今次就斬埋頭。唔係國泰頭，唔係快運頭，係你同我嘅頭。冇平價機票冇人權，應該要告上ICJ（定ICC？唔係九龍站）。
拿，人總要犯同樣錯誤。我記得最初出公告（唔好計傳聞啦）時，仲要有人話「都未買得成」「可能有變數」。炒過丸龜買譚仔一次車都未學精喎。又話鍾國頌唔高興（Who the弗？泊車仔咋）又話中聯辦不滿國泰太高調乜鬼。
好心就搵個有財經常識嘅朋友睇下。普通拎兩皮嘢嘅尊尼亞分析員都答到你（答唔到嘅，請過第個啦）。
大佬，咁你一日未完成，quite simply，就係一日未完成架啦。係架，有機會告吹架，可能公佈完第日國泰就破產呢，可能快運破產呢，可能中國破產呢，可能核戰呢。好多可能架嘛。
都真係試過的，例如你金融海嘯前夕做收購咪會咁咯。一個唔該對家執笠，或者你執笠。
但，be sensible啦好冇，細路仔玩泥沙咩。烏鴉投長紅四千萬零一鎊咩。出得公告董事簽晒名，你估篤手指咩。
同樣地，股價唔會等你科埋水畀埋錢換埋招牌先反映，行家亦唔會等你坐埋入人地公司先做嘢咯。
講返，就梗係最黑暗的一天啦。我記得有人話啲機票唔會貴咗，我地睇過？
印尼嗰邊早排有單冇乜人理嘅故事，話經過一輪行業整合，死剩嘉魯達（GA）同埋獅子航空（JT）兩間。機票價格就梗係大升，結果要政府查反壟斷。
（BTW，呢隻嘉魯達，就係之前我去暹粒吳哥寺提嘅金翅仆街鳥。三相神毗濕奴隻坐騎，鍾意食蛇（正是NAGA，金界控股），仲係天龍八部之一。所以你睇我啲文幾有教育意義）
咁香港唔係印尼，但即係，少間競爭，唔會貴咗，真係唔係好合我常識。或者回帶諗法，點解你可以一年去幾次日本？點解我廿年前去英國成皮嘢機票而家好似仲要平咗？
根本都唔使等國泰買起埋快運，本人一年去幾次日本（仲有韓國）（仲有台灣）（仲有泰國），目測啲極平機票過去一年已經越嚟越少。正係因為快運港航開始有啲財政壓力—同埋，發現根本加咗價都係咁多人去。你估真係杯葛國泰咩。（BTW，而家太古又話社會良心，咁杯唔杯葛國泰？好亂）
仲有最後一樣，就係國泰出到近50億買，而快運嘅帳面值得10億多啲。4倍幾近5倍BOOK，全世界都冇咁貴嘅航空公司。咁又當然啦，你收購就梗係要溢價，市價實鬼賣畀你。即係招商買永隆 星展買道亨咁，全部都係天價。
而又在呢個企業蛋治嘅角度講，其實套理論係根本多數收購都係買貴嘢，因為管理層好大喜功可以留名，爛攤就留畀下手，同埋股東埋單。例外當然大把，例如當年Facebook 買 Instagram，全球近N年最佳收購。舊文有寫 （http://bit.ly/2M2ur8q）（http://bit.ly/2M2SDaS）
基本金融常識了，上次都講過，50億買10億帳面值嘅公司會點？你個巴能shit點平？就平唔到，整舊40億嘅嘢LONG住。就叫佢「Goodwill」，中文劣譯成「商譽」。就真係唔關被買間公司有乜聲譽。唔通你壓到佢10億佢就冇聲譽？
上次中電盈警時講過呢樣嘢：（http://bit.ly/2YgJ9M8）
咁呢度近40億嘅商譽，就總有一日會減值。唔使等好耐，到個行業周期下行你就會見到。友版高天佑在文章 「爆裂刑警」（http://bit.ly/2M2Qs6U）話齋，
「正如一位前輩朋友指出，上市公司發盈警向來有「一窩蜂」和「博大霧」因素，例如若見到不少同級數公司舉了紅旗，自己亦趁機把業績中一些潛在問題暴露出來，無謂日後「獨自盈警」那麼醜怪。此外，所謂「一件污兩件穢」，有些公司索性把積聚的問題集中引爆，為業績洗澡」
（彩蛋：個前輩就係我）
不過，濕碎啦，40億。國泰鍾意聽日就減值都仲得，一鑊過食晒都仲得。根底厚嘛。600幾億帳面值，食得起。
等於中電地鐵嗰啲，減值咪減值盈警咪盈警。無線就差啲，但都頂得住。有線嗰啲就好危殆（所以要係咁供股）。舊文亦寫過（http://bit.ly/2SkrDEG 睇有線電視: 蝕錢唔緊要，但蝕唔蝕得起？）
呀，睇完，仲未覺得係最黑暗一天嘅。話多樣嘢你知：啲YEN差不多7.3算了。低位升返差不多兩成。
係咪真係要去信ICC定ICJ 關注下基本人權？
Search